आरटीई प्रवेशासाठी ऑनलाइन सोडत जाहीर,बारा जून नंतर निवड यादी प्रसिद्ध होणार
शिक्षण विभागाने केलेल्या बदलास न्यायालयाने स्थगिती दिल्यानंतर जुन्या नियमांनुसारच प्रवेश प्रक्रिया राबविली जात आहे. सुरुवातीला १७ ते ३१ मे पर्यंत ऑनलाइन अर्ज मागविण्यात आले होते. या मुदतीत अनेकांना अर्ज करणे शक्य झाले नसल्यामुळे राज्य शासनाच्या शिक्षण विभागाने आरटीई प्रवेश अर्जासाठी ४ जूनपर्यंत मुदतवाढ दिली होती. त्यामुळे अर्ज संख्या वाढली.
आरटीई अंतर्गत प्रवेश देण्यासाठी ७ जून रोजी लॉटरी काढली जाणार आहे. मात्र, न्यायालयात १२ रोजी सुनावणी असल्याने त्यानंतर १३ जून रोजी लॉटरीचा निकाल जाहीर करुन विद्यार्थ्यांची निवड प्रसिद्ध केली जाणार असल्याची माहिती न्यायालयातशिक्षण विभागाने दिली आहे.
राज्य सरकारच्या ९ फेब्रुवारीच्या अधिसूचनेला स्थगिती देण्याचा निर्णय मागे घेण्यासाडी काही शाळांना उच्च न्यायालयात धाव घेत याचिका दाखल केली आहे. त्यामुळे पुन्हा एकदा पालकांची धाकधूक वाढली आहे. यावर १२ जून रोजी सुनावणी होणार असून त्यात काय होते, याकडे लक्ष लागले आहे.
शैक्षणिक वर्षे २०२३-२४ मध्ये आरटीई अंतर्गत प्रवेशासाठी २७६६ पालकांनी ऑनलाइन अर्ज दाखल केले होते. त्या तुलनेत यंदा ७१७ अर्ज कमी आले आहेत. सुरुवातीला प्रवेश प्रक्रिये बदल करण्यात आला. त्यानंतर पुन्हा जुन्या नियमांनुसार प्रवेश अर्ज मागविण्यात आले. यामुळे ऑनलाइन अर्जाची प्रक्रिया विलंबाने सुरु झाली. तोपर्यंत अनेक पालकांनी आरटीईची प्रतीक्षा न करता इतर शाळांमध्ये प्रवेश घेतल्यामुळे यंदा अर्ज कमी आल्याचे दिसते.
