सहायक गटविकास अधिकार्यासह विस्तार अधिकारी लाचलुचपत प्रतिबंधक खात्याच्या पथकाने रंगेहात पकडले.
सध्या राज्यात दिवाळी सणाच्या निमित्ताने शासकिय कार्यालयांना सुट्टी आहे. मात्र सुटीच्या दिवशी देखील कार्यालयात येऊन पाच लाखांची लाच स्वीकारणार्या सहायक गटविकास अधिकार्यासह विस्तार अधिकार्याला आज लाचलुचपत प्रतिबंधक खात्याच्या पथकाने रंगेहात पकडल्याने एकच खळबळ उडाली आहे.
जामनेर तालुक्यातील एका लोकसेवकाच्या विरोधात चौकशी सुरू होती. या चौकशीत अनुकुल असा रिपोर्ट देण्याच्या बदल्यात त्याला संबंधीत समितीचे अध्यक्ष व सदस्याने तब्बल पाच लाख रूपयांची लाच मागितली. संबंधीत व्यक्तीला लाच द्यायची नसल्याने त्यांनी या संदर्भात जळगावच्या अँटी करप्शन ब्युरोकडे तक्रार केली.
दिलेल्या तक्रारीनुसार पाडव्याची सुटी असतांना देखील सहायक गटविकास अधिकारी रवींद्र शालीग्राम सपकाळे ( वय ५४) आणि विस्तार अधिकारी पद्माकर बुधा अहिरे ( वय ५३) या पंचायत समितीतील दोन्ही अधिकार्यांनी चौकशी सुरू असलेल्या लोकसेवकास बोलावले व पाच लाखांची लाच स्वीकारत असतांना या दोघांना एसीबीच्या पथकाने रंगेहात पकडून त्यांना ताब्यात घेतले.
सदर कारवाई ही सापळा जळगाव लाचलुचपत प्रतिबंधक खात्याचे पोलिस उपअधीक्षक सुहास देशमुख यांच्या मार्गदर्शनाखाली पोलिस निरीक्षक अमोल वालझाडे, पोलिस निरीक्षक एन.एन.जाधव बाळू मराठे, सुनील वानखेडे, राकेश दुसाने, दिनेशसिंग पाटील, सुरेश पाटील, रवींद्र घुगे, महिला हवालदार शैला धनगर, किशोर महाजन, प्रदीप पोळ, प्रणेश ठाकूर आदींच्या पथकाने केली. शेवटचे वृत्त हाती आले तेव्हा या प्रकरणी जिल्हापेठ पोलीस स्थानकात गुन्हा नोंदविण्यात आला होता.
