विश्वरत्न डॉ.बाबासाहेब आंबेडकरांच्या जगातील सर्वात उंच पुतळ्याचे अनावरण…
आंध्र प्रदेशचे मुख्यमंत्री वायएस जगमोहन रेड्डी यांनी डॉ.बाबासाहेब आंबेडकरांच्या पुतळ्याचे अनावरण केले. विजयवाडा येथे उभारण्यात आलेला हा डॉ.आंबेडकरांचा जगातील सर्वात उंच असा पुतळा आहे. या पुतळ्याची उंची २०६फुट इतकी आहे.
हा पुतळा ८१ फुटाच्या पॅडस्टलवर उभा आहे. पॅडस्टलशिवाय त्याची उंची १२५ फुट इतकी होते. स्वराज मैदानावर उभारण्यात आलेल्या या पुतळ्याजवळ एक्सपिरियन्स सेंटर, २ हजार लोक बसू शकतील असे कन्व्हेन्शन सेंटर, एक फुड कोर्ट, मुलांना खेळण्यासाठी जागा, जलकुंभ, संगीत कारंजे अशा सुविधा आहेत.
ज्या मैदानावर हा पुतळा उभारण्यात आला आहे त्याचे नाव आता अधिकृतपणे डॉ.बी.आर.आंबेडकर स्वराज्य मैदान असे करण्यात आले आहे. पुतळ्याचे अनावरण झाल्यानंतर या ठिकाणी सर्वांना प्रवेश असेल. राज्याच्या माहिती आणि जनसंपर्क विभागाने दिलेल्या माहितीनुसार, हा देशातील सर्वात उंच बिगर-धार्मिक पुतळा आहे. तसेच याची निर्मिती पूर्णपणे भारतीय आहे.
या कामासाठी ५०० कर्मचारी आणि ५५ इंजिनिअर २ वर्ष मेहनत घेत होते. या पुतळ्यासाठी ४०० टेन स्टेनलेस स्टील आणि १२० टन ब्राँझचा वापर करण्यात आलाय. या ठिकाणी दोन मिनी थिएटर देखील असून येथे डॉ.आंबेडकरांवरील लघुपट दाखवले जाणार आहेत. परिसरात सहा जलकुंभ असून प्रकल्पाच्या मध्यभागी संगीत कारंजा करण्यात आला आहे.
जगातील सर्वात उंच डॉ.बाबासाहेब आंबेडकर यांच्या पुतळ्याला ‘सामाजिक न्यायाचा पुतळा’ असे नाव देण्यात आले आहे. जगातील सर्वात उंच ५० पुतळ्यांमध्ये याचा समावेश असेल. या पुतळ्याच्या निर्मितीची घोषणा राज्य सरकारने २०२० मध्ये केली होती. यासाठी २६८ कोटी इतका निधी मंजूर करण्यात आला होता. पुतळ्याच्या आणि स्वराज मैदानावरील कामाला जून २०२० मध्ये सुरुवात झाली होती.
