पाच लाख विद्यार्थ्यांची यु-डायस प्लसमध्ये नोंदणी बाकी,31 डिसेंबर पर्यंत मुदत…
राज्यातील सर्व शाळांमधील विद्यार्थ्यांची माहिती यु-डायस प्लस प्रणालीवर नोंद करण्याची कार्यवाही येत्या 31 डिसेंबर पर्यंत पूर्ण करण्याचे निर्देश देण्यात आले होते. मात्र अजूनही तब्बल 4 लाख 98 हजार 888 विद्यार्थ्यांची माहिती भरण्याचे काम प्रलंबित असल्याचे समोर आले आहे. त्यामुळे राज्याला प्राप्त होणाऱ्या निधीवर परिणाम होणार आहे. त्यामुळे याबाबत दोषी असणाऱ्यावर जबाबदारी निश्चित करून प्रशासकीय कारवाई केली जाणार आहे,असे राज्याचे माध्यमिक उच्च शिक्षण संचालक संपत सूर्यवंशी यांनी स्पष्ट केले आहे.
यु-डायस प्रणालीवरील राज्यातील 1 लाख 8 हजार 326 शाळांमधील 2 कोटी 8 लाख 76 हजार 625 विद्यार्थ्यांपैकी 2 कोटी 3 लाख 77 हजार 737 विद्यार्थ्यांची माहिती यु-डायस प्लस प्रणाली मध्ये भरण्यात आली असून, अजूनही 4 लाख 98 हजार 888 विद्यार्थ्यांची माहिती भरण्याचे करण्याचे काम प्रलंबित आहे. यु-डायस प्लस प्रणालीवरील शासकीय 75 हजार 130, खाजगी अनुदानित 1 लाख 55 हजार 423 , खाजगी विनाअनुदानित 38 हजार 785 , स्वयंअर्थसहायित 2 लाख 23 हजार 440 व अनधिकृत 6 हजार 137 विद्यार्थ्यांची माहिती यु-डायस प्लस प्रणालीवर अद्यावत करण्यात आलेली नाही.
राज्यातील 100% शाळांची माहिती यु-डायस प्रणालीवर 31 डिसेंबर पर्यंत पूर्ण करणे आवश्यक आहे. माहिती पूर्ण न झाल्यास संबंधितांवर प्रशासकीय कारवाई केली जाणार असल्याचे राज्याचे माध्यमिक शिक्षण संचालक संपत सूर्यवंशी यांनी परिपत्रकाद्वारे स्पष्ट केले आहे.
