तळवडे एमआयडीसीमध्ये फटाक्याच्या कंपनीला आग लागून ७ जणांचा मृत्यू…
पिंपरी चिंचवड येथील तळवडे परिसरात असणाऱ्या एका फटका गोदामाला आग लागून ७ जण मृत्यू झाल्याची घटना समोर आली आहे.
पिंपरी चिंचवड परिसरात असणाऱ्या तळवडे येथे ज्योतिबा मंदिराच्या मागे असलेल्या एका फटाक्याच्या कंपनीमध्ये स्फोट झाला आहे. यात सहा महिलांचे मृतदेह आतापर्यंत बाहेर काढण्यात आले आहेत. आज दुपारी साधारण अडीच ते पावणे तीनच्या सुमारास ही घटना घडली. वाढदिवसाला केकवर लावण्यात येणाऱ्या मेणबत्ती आणि फटाक्यांची ही कंपनी असल्याची माहिती समोर आली आहे.
या कंपनीत काम करणाऱ्या सर्व महिला कामगार असून तापमान वाढल्याने हा स्फोट झाल्याची प्राथमिक माहिती समोर आली आहे. अचानक स्फोट झाल्याने बाहेर ये-जा करण्यासाठी एकच शटर असल्याने या महिला आत अडकल्याचे समजते. स्फोटची तीव्रता एवढी होती की, आवाजाने शटर बंद झाले होते. त्यामुळे महिलांना बाहेर पडणे अवघड झाले. त्यात त्यांचा मृत्यू झाला असल्याची माहिती समोर आली आहे.
घटना घडल्यानंतर जवळ असलेल्या नागरिकांनी जखमींना जवळच्या रुग्णालयात हलवले होते. अग्निशामक दलाचे जवान व पोलिस प्रशासनघटनास्थळी दाखल झाल्यानंतर मृतदेह बाहेर काढण्यात आले. यात आठ जण जखमी झाले असून त्यांच्यावर ससून रुग्णालयात उपचार सुरू आहेत.
